👨‍👩‍👧‍👦الوصايا السبع للأعياد مع الاطفال ١- الاطفال هتفضل اطفال عيد او غير عيد هيدخلوا في نوبات غضب على اصغر الاسباب ، ودا وارد جدا بسبب حاجات كثير في العيد زي لو مش نايمين كويس ، لو لعبوا كثير لمدة طويلة ، لو جعانين بعد لعب طويل ، لو في مكان زحمة ومش بيحبوا الزحمه . ٢- بلاش تجبروا اطفالكم تشارك العابها في العيد في الزيارات العائليه عندكم في البيت ، لان مش كل الاطفال مستعده لمشاركه العابها مع غيرهم والحل ؟ اتفقوا معاهم على عدد العاب محدد هما يوافقوا انهم يشاركوه مع غيرهم من الاطفال في الزيارات العائلية وباقي الالعاب تتشال من قدام الاطفال الثانيه ٣- مش كل الاطفال اجتماعية بنفس الدرجة فيه اطفال تدخل اي تجمع عائلي تندمج بسرعة وفيه اطفال بتاخد وقت ، فبلاش ضغط منكم او ياريت الي بيقرأ البوست بلاش ضغط بالتعليقات على الاطفال من النوع دا بالذات ومع عدم تسليط الضوء هتلاقوا الاطفال فكت وبقت احسن واهدى وقابله انها تسلم عليكم ٤- بلاش شيل الرضع بالغصب وتقبيلهم بالعافيه او تقبيلهم من الفم دي عادات قديمة وغلط ومش مقبوله اولا نقل امراض وثانيا انتهاك لجسمهم ٥- بلاش الضحك والهزار الجامد على الاطفال لمًا تقع او تقول حاجة غلط ، فيه اطفال بتتأثر جدا فيها التريقه والهزار والضحك عليهم وبيتأثروا بيها . وفيه اطفال بتتعلم اسلوب التريقة منكم وتطلع بعدين تتريق وتسخر على غيرها من الاطفال في المدرسة بنفس الطريقه ! ٦- بلاش مقارانات بين الاطفال وبعضها مين بيمشي بدري ومين بيتكلم اسرع ومين معاه بطولة في الكارتية ومين هادي ومين مش هادى ، تقبلوا حقيقه الاطفال ليها انماط وشخصيات زيهم زينا عادي جدا واحنا كل فرد فينا متميز في شيء هما كمان كدا ، والمقارنة مش هتعمل حاجة غير انها تضايقكم وتضايقهم ٧- يا بخت من زار وخفف يعني لو لقيتوا الزيارة كلها صراخ وغضب وخناقات بين الاطفال وبعضها مهما حاولتم مافيش بينهم كميا ، الافضل كدا نشرب الشاي بتاعنا ونسلم على بعض ونود بعض ونتوكل على الله مش لازم نقعد مدة طويلة كلها صريخ ويارب عيد حلو عليكم وعلى كل اطفالكم واحبابكم 🌸🌸 دعاء كرسون / اخصائية تعديل سلوك - مدربة تربية ايجابية للوالدين - موجهة منتسوري للطفولة المبكرة معتمدة من هيئة MEPI الدولية . #تربية #eid #عيد_سعيد #عيد_مبارك